ქართული
English
ადიგენის მუნიციპალიტეტის მერი გოჩა ქიმაძე, მერის მოადგილე სოსო რეხვიაშვილი, საკრებულოს თავმჯდომარე შმაგი ბიძიშვილი, მერიის და საკრებულოსა წარმომადგენლები, ასევე ადიგენის საგანმანათლებლო რესურსცენტრის ხელმძღვანელი ინგა ბოჭორიშვილი ტრადიციულად მუნიციპალიტეტში მდებარე საჯარო სკოლებს ესტუმრნენ და სწავლის დაწყებისადმი მიძღვნილ ღონისძიებებს დაესწრნენ.
პირველკლასელებმა ღონისძიება საქართველოს ჰიმნით გახსნეს და სტუმრებს შემოქმედებითი ნომრები წარუდგინეს. ადგილობრივი თვითმმართველობის წარმომადგენლებმა სკოლის ინფრასტრუქტურა დაათვალიერეს, მოსწავლეებს სწავლის დაწყება მიულოცეს და მერიისაგან საჩუქრად სასკოლო-საკანცელარიო ნაკრებიც გადასცეს.
საზეიმო ღონისძიებების ფარგლებში განსაკუთრებულად აღინიშნა სოფელ არლის საჯარო სკოლის პედაგოგების მრავალწლიანი ღვაწლი. სკოლის ადმინისტრაციამ მასწავლებლებს მარო ჩხიტუნიძეს, ნოდარ ჩილინგარაშვილს, ცირა ვარდიძეს და თამარ მათოშვილს პროფესიულ საქმიანობაში 40-წლიანი მოღვაწეობისათვის ვარსკვლავი გაუხსნეს.
დღესვე, პედაგოგიური საქმიანობიდან საზეიმოდ გააცილეს ღვაწლმოსილი მასწავლებლები – ივანე ბათმანაშვილი და ნოდარ კაჭკაჭაშვილი, რომელთაც ათწლეულების განმავლობაში უმნიშვნელოვანესი წვლილი შეიტანეს ჩვენი მომავალი თაობების აღზრდაში. მათი პროფესიული გზა ღირსეულად შეაფასა როგორც სკოლამ, ასევე ადგილობრივმა თვითმმართველობამ.
მუნიციპალიტეტის მასშტაბით, დღეს, 25-ვე საჯარო სკოლაში სასწავლო პროცესი განახლდა და 150 პირველკლასელს, განათლების სამინისტროს საჩუქართან – სახელმძღვანელოებთან და ნეთბუქებთან ერთად, მერიისგან სასკოლო-საკანცელარიო ნაკრებიც გადაეცა.