ინფრასტრუქტურული სამუშაოების ფარგლებში, დაბაში კაპიტალურად ეწყობა როგორც სავალი ნაწილები, ასევე მთლიანი საკანალიზაციო სისტემა, სასმელი წყლის ქსელი, სათავე და გამწმენდი ნაგებები.

ასევე სრული რეაბილიტაცია მიმდინარეობს “როშა პარკის”, ეწყობა მოსასვენებელი სივრცეები, ბილიკები, უკვე მოეწყო სტადიონი.

კურორტის განვითარების გეგმის ფარგლებში, დაბის შესასვლელში შენდება ელექტრომობილების დამტენებით აღჭურვილი ავტოსადგომი. ასევე მიმდინარეობს დაბის მწვანე და ლურჯი დერეფნების რეაბილიტაცია, რომელიც მდინარის კალაპოტისა და სახიდე გადასასვლელების, საფეხმავლო და ველო-ბილიკების, რეკრეაციული და მოსასვენებელი ადგილების მოწყობას, ცენტრალური გზის, ისტორიული და სამეცნიერო ობიექტების აღდგენას მოიცავს.

აქტიურად, მიმდინარეობს მრავალბინიანი კორპუსების ფასადების კაპიტალური რეაბილიტაცია, მე-19-მე-20 საუკუნეების ისტორიული სახლებისა და ეროვნული ასტროფიზიკური ობსერვატორიის რეაბილიტაცია. კურორტ აბასთუმნში სამუშაოები განაშენიანების გენერალური გეგმის მიხედვით მიმდინარეობს.

პროექტს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი ახორციელებს, ასევე მნიშვნელოვანი წვლილი მიუძღვის ფონდს “ქართუ”-ს, რომლის ინიციატივითაც დაიწყო კურორტის განვითარება და გალამაზება.