ადიგენის ცენტრალურ პარკში, დამამთავრებელი კლასის მოსწავლე-ახალგაზრდებმა მაყურებლის წინაშე სხვადასხვა შემოქმედებითი ნომრები და დადგმები წარმოადგინეს. გაიხსენეს 12 წლის განმავლობაში მომხდარი, ყველაზე მნიშვნელოვანი და დასამახსოვრებელი მომენტები.

აბიტურიენტებს სიტყვით, ადიგენის მუნიციპალიტეტის მერმა, გოჩა ქიმაძემ მიმართა და ახალი ინიციატივა გააცნო:

„ძვირფასო ახალგაზრდებო, გილოცავთ სკოლის დამთავრებას. გისურვებთ წარმატებულ, ბედნიერ და ლაღ სტუდენტობას. თქვენ ხართ ის ახალგაზრდები, რომლებმაც უნდა შექმნათ ქვეყნის მომავალი, ხვალინდელი დღე. ადიგენის მერია ყოველთვის ცდილობს იყოს ახალგაზრდების სამსახურში, ამიტომ ჩვენ გვაქვს კიდევ ერთი ახალი ინიციატივა- ადიგენის მუნიციპალიტეტში მცხოვრებ სკოლადამთავრებულებს, რომლებიც ერთიან ეროვნულ გამოცდებში 100% დაფინანსების მფლობელები გახდებიან, მერიისაგან ერთჯერადად ფულადი საჩუქრით, 2500 ლარით დასაჩუქრდებიან.

პროგრამას, რომელსაც მერია მიმდინარე წელს განახორციელებს მიზნად აბიტურიენტების წახალისებასა და მათში მოტივაციის ამაღლებას ისახავს.

ჩემო ძვირფასებო, კიდევ ერთხელ გილოცავთ სკოლის დამთავრებას და წარმატებებს გისურვებთ, ცხოვრების ახალ ეტაპზე”-აღნიშნა მერმა.

ახალგაზრდებს სკოლის დამთავრება მერთან ერთად, საკრებულოს თავმჯდომარემ შმაგი ბიძიშვილმა, ადიგენის რესურსცენტრის ხელმძღვანელმა, დაბა ადიგენის საჯარო სკოლის დირექტორმა და მასწავლებლებმა მიულოცეს.

ღონისძიებას ადგილობრივი თვითმმართველობის წარმომადგენლები, სკოლის პედაგოგები, მოსწავლე -ახალგაზრდები და მათი მშობლები ესწრებოდნენ.